पनवेल महापालिका क्षेत्रातील बचत गटांमध्ये सक्रिय असणाऱ्या महिलांसह आशा स्वयंसेविकांनी 'लोकसभा निवडणुकीत मतदान करा' हा संदेश घरोघरी पोहोचविण्यासाठी सभांचे आयोजन करीत , घरोघरी जाऊन जनजागृती केली. तसेच पालिका क्षेत्रात ठिकठिकाणी फेरी काढून जनजागृती केली.
पनवेल महापालिका क्षेत्रात २१७ आशा स्वयंसेविका आहेत. तसेच पालिका क्षेत्रात ३५० महिलांचे बचतगट असून त्यातील सुमारे दीड हजार सक्रीय महिलांनी एकत्रित येऊन मतदान करा हा संदेश पालिका क्षेत्रात घरोघरी पोहचविला आहे. पनवेल पालिका क्षेत्रातील देवीचा पाडा, मुर्बी गाव, पालेखुर्द, करवले गाव, कळंबोली, लोखंडी पाडा, तक्का गाव याठिकाणी नागरिकांच्या बैठका घेण्यात आल्या. तसेच पनवेमधील ख्वाजा नगरी झोपडपट्टी येथे घरोघरी जाऊन पत्रके देऊन मतदान करण्याविषयी जनजागृती करण्यात आली.
सार्वत्रिक लोकसभा निवडणूक २०२४ च्या पार्श्वभूमीवर पनवेल महापालिकेच्या लोकनेते दि.बा पाटील विद्यालय व ज्ञानज्योती सावित्रीबाई फुले शाळा पोदी यांच्यावतीने मतदारांमध्ये जनजागृती करण्यासाठी प्रभातफेरी काढण्यात आली. या उपक्रमात शाळेच्या सर्व शिक्षकांनी व विद्यार्थ्यांनी मोठ्या उत्साहाने या प्रभात फेरीमध्ये सहभाग घेतला. यावेळी विद्यार्थ्यांनी "मतदार राजा जागा हो.. लोकशाहीचा धागा हो...", "वोट देने जाना है... देश को आगे बढाना है... ", "आपल्या मताचे दान आहे लोकशाहीची शान" अशा घोषणा देत नागरीक, व्यावसायिक, फळ, भाजी विक्रेते या मतदारांमध्ये मतदान करण्यासाठी जनजागृती केली. महापालिका शाळा क्रमांक ४ मध्ये रांगोळी स्पर्धांच्या माध्यमातून महापालिकेद्वारे विद्यार्थ्यांच्या मदतीने मतदार जनजागृती करण्यात आली. पनवेल मनपा शाळा क्रमांक ८ च्यावतीने मतदानावर आधारित घोषवाक्य स्पर्धा घेण्यात आली; तर गुजराती शाळा क्रमांक ९ मध्ये रांगोळी स्पर्धा घेण्यात आल्या. या स्पर्धांमधून विद्यार्थ्यांनी आपल्या कल्पना शक्तीचा वापर करून सुंदर अशी चित्रे व रांगोळ्या काढल्या.
सुमारे २ लाख विद्यार्थ्यांच्या माध्यमातून ‘मतदान करणे हे प्रत्येक नागरिकांचे प्रथम कर्तव्य आहे, हे कर्तव्य बजावत असताना सुजाण नागरिक म्हणून तुम्ही निवडणुकीत मतदान करा’ अशा आशयाच्या पत्रांचे वाटप पनवेल महापालिका क्षेत्रात करण्यात आले. याचबरोबर महापालिकेच्या लोकनेते दि.बा.पाटील विद्यालयामध्ये पालकसभा व व्यवस्थापन समितीच्या सभा घेऊन ‘ देशाची लोकशाही व्यवस्था मजबूत करण्यासाठी नागरिकांनी मतदान करणे गरजेचे असल्याचा’ संदेश पालकांना देण्यात आला.
आपल्या मताचे दान आहे लोकशाहीची शान... या घोषवाक्याला साजेसं मतदान आणि मतदार जागृती अभियान पनवेल महानगर पालिकेने राबविले. फक्त राबविलेच नाही तर नागरिकांनाही या मतदान जनजागृती अभियानात सहभागी करून घेतले.
Facebook: https://www.facebook.com/MAHAUDD
Twitter: https://twitter.com/MAHA_UDD
Instagram: https://www.instagram.com/maha_udd/
Blog: https://mahaudd.blogspot.com/
YouTube: https://www.youtube.com/channel/UCe9-Tq8QTPQ4h8IyXp2wbvw
LinkedIn: https://tinyurl.com/2bpdv9sv
Podcasts: https://tinyurl.com/5yrth66x
No comments:
Post a Comment